There was an error in this gadget

Wednesday, December 24, 2014

නන්නාඳුනනා සුළඟක් නම්..

------
'නන්නාඳුනනා සුළඟක් නම්' ගීතය සිංහල ගීත සහිත්‍යයේ ලියැවුණු බොහෝ විශිෂ්ට ගී පද රචනයන්ට ස්වකීය ගායන හඬ පෞර්ෂයෙන් දායක වුණු ප්‍රවීණ ගායන ශිල්පී අමරසිරි පීරිස් මහතාගේ අලුත්ම ගීතය යි.මේ 'නන්නාඳුනනා' ගීතයේ අර්ථය අඳුන ගන්නට කළ වෑයම යි.
අපි අසන සහ අපිට ඇසෙන බොහෝ දෙස්-විදෙස් ගීත වල තිබෙන්නේ භද්‍ර යෞවනයේ තරුණ-තරුණියන් අතර ඇති වන ප්‍රේමයේ විරහව හෝ සුන්දරත්වය හඟවන අර්ථයන් ය.නමුත් විවාහයට පත් වූ අඹු-සැමි ප්‍රේමවන්තයින්ව ප්‍රස්තුත වුණු ගීත සංඛ්‍යාව ඉතාම අල්ප ය.'නන්නාඳුනනා සුළඟක් නම්..' ගීතය ද ඒ අල්ප ගීත අතරින් එකක් කීවොත් වඩා නිවැරදි ය.
මේ ගීතයේ කියැවෙන්නේ තමාගේ බිරිඳ විසින් තමාව හැර දමා යාම නිසා වේදනාවට පත් වූ සැමියකුගේ ශෝකාලාපයකි.එම ප්‍රකාශය මෙසේ සාධනය කරමි.
බොහෝ විට සුළඟක් ගඟක් අසලින් හමා ගෙන යනවා නම් ඒ ගඟේ ජලය කැලතීමකට ලක් වෙයි.සෙලවෙයි.ගහක් අසලින් හමාගෙන ගියොත්,ඒ ගහේ කොළ සෙලවීමකට ලක් වෙයි.මේ ගීතයේ කතා නායකයා වන ස්වාමි පුරුෂයාගේ බිරිඳ ද ඔහුව හැර දමා යන්නේ සුළඟක් වගේ ය.ඒ නිකම් නම් නොවේ,සුළි සුළඟක් වගේ ය.තමාගේ සිත කලතවමින්-සෙලවමින්-සසල කරමින්-සිතුවිලි අතරමං කරමින් තමා හොඳටම දන්න හඳුනන බිරිඳ වෙන් වී යන විට ඒ දුක ඔහුට දරා ගැනීමට බැරි වෙයි.

''නන්නාඳුනනා සුළඟක් නම්
එය දරා ගන්න තිබුණා
දන්නාඳුනනා ප්‍රියම්භිකාවිය
සිත අවතැන් කොට
සුළි සුළඟක් වී
ඔබ යන්න ගිහින් තිබුණා''

බෞද්ධ සාහිත්‍යයේ ද සඳහන් වන පරිදි බිරිඳක් වීමට කලින් අවබෝධ කර ගත යුතු අවවාදයක් ඇත.එනම් 'පිටත ගිනි ඇතුලතට නො ගත යුතු ය.ඇතුලත ගිනි පිටතට නො දිය යුතු ය.'යන්න යි.එය සිත් දෙකක් තියෙන-ශරීර දෙකක් තියෙන ගැහැණියක් සහ පිරිමියෙක් එකට එක් වී පවුල් ජීවිතයක් පවත්වාගෙන යාමේ දී අවධානය යොමු කළ යුතු වැදගත් රීතියකි.බොහෝ පවුල් ජීවිත වල ප්‍රශ්න ඇවීලී පැතිර යාමෙන් පවුල විනාශ වී යන්නේ ද මෙම රීතිය කඩ කර ගැනීම නිසා ය.මොහුගේ පවුල් ජීවිතයට ද බලපාන්නේ ද මෙම කාරණාවම ය.'සස්වාමික පෙම' යන්නෙන් අරුත් ගැන්වෙන්නේ අඹු-සැමි ප්‍රේමය යි.ඉතින් පිටතිනුත් ඇතුලෙනුත් ප්‍රශ්න වලින් ඇවිළුණු මොවුන්ගේ පවුල් ජීවිතය ඇතුලින් අඹු-සැමි ප්‍රේමය සදහටම පලා යයි.

''ගෙයි ඇවිළුණු ගිනි පිටට ගියා
පිට ගින්දර ගෙයි ඇවිල ගියා
යලි ඉපදෙනු බැරි
සස්වාමික පෙම
පෑල දොරින් පලා ගියා''

ගොඩක් වෙලාවට හමා ගෙන එන සීතල සැඩ සුළං හමා ගෙන යන්නේ මහා වර්ෂාවක පෙර නිමිති සලකුණු කරමින් ය.ඉතින් මේ ගීතයේ පූර්වයේම කථකයා පවසන්නේ තමාගේ බිරිඳ තමාගේ මුළු ජීවිතයම අවතැන් කරමින් වෙන් ව ගියේ සුළි සුළඟක් වගේ බවයි.ඉතින් ඇගේ නික්මීමත් සමග මොහුගේ ජීවිතයට කඳුළු වර්ෂාවක් ඇදහැලෙයි.ඇය ඔහුට අවසාන වශයෙන් ඉතිරි කර යන්නේ කඳුළු බිංදු පමණි.ගී පද රචකයා එය රූපකාර්ථවත් ලෙස පවසන්නේ මෙසේ ය.

''කෙඳිරිලි වරුසා ඇද හැලුනා
මා හදවත දොර ගුළු වැහුනා
යළි සිප ගනු බැරි
නුඹේ කඳුළු බිඳු
මා උරතලයේ ඉතිරි වුණා''

අවසාන වශයෙන් මෙසේ පවසමි.බොහෝ විරහ ගීත තොග පිටින් බිහිවෙන කාලෙක මෙම ගීතයේ පද රචනය සාහිත්‍ය ගුණයෙන් ඉහළ දුර්ලභ පද රචනයකි.ගීතයේ සංගීතය ද පද රචනයේ අර්ථයට ගැලපෙන ආකාරයෙන් නිර්මාණය වී ඇතැයි කීම යුක්ති යුක්ත ය.





--------
සමීර සම්පත්.

Tuesday, December 23, 2014

කොලරා කාලේ ආලේ..

මං නුඹට ආදරේ බව
දැන දැනම
නුඹ මගෙන්
වෙන් වුනාට,
දවසින් දවස
අලුත් අලුත්
අත්දැකීම් එක්ක
ජීවිතය ගෙවී යන විට,
දැන දැනම
මට නුඹව
අමතක කරන්න
බැරි වුනාට
සමාවෙයන්
ෆර්මිනා....


මීට,
ආදරණීය ෆ්ලෝරෙන්තිනෝ.
-----
සමීර සම්පත්.

Monday, December 22, 2014

Gravity


සිනමාව යාථාර්තයක් නොවේ.නමුත් අපි චිත්‍රපටියක් බලන විට එය කල්පිතයක් නොවන ලෙස දැනෙනවා නම් එය එම සිනමා නිර්මාණයේ සේම සිනමාකරුවාගේ ද විශිෂ්ටත්වය යි.Gravity චිත්‍රපටිය ද එවන් වූ විශිෂ්ට නිර්මාණයක් යැයි කීම නිවැරදිය.අපි බලා ඇති බොහෝ චිත්‍රපටි වල කතා මාලාව ගෙතී ඇත්තේ ඕසෝන් ස්තරයෙන්(Ozone Layer) ඇතුලත ජීවත් වන මිනිසුන්ගේ ජීවිත ගැන සහ ඔවුන් මුහුණ දෙන ගැටලු වටාය.නමුත් Gravity චිත්‍රපටියේ කතාව ගෙතී ඇත්තේ ඕසොන් ස්තරයෙන් පිටත සිටින ඇමරිකානු ගගනගාමීන් දෙදෙනෙකු වටා ය.Dr. Ryan Stone(Sandra Bullock) සහ Lieutenant Matt Kowalski(George Clooney) දෙදෙනා තමන් වැඩ කරන ෂටලයේ අලුත් වැඩියා කටයුතු වල නිරතවෙමින් සිටියි.ඔවුන් දෙදෙනාට අමතරව තවත් එක් ගගනගාමියෙක් එම ෂටලයේ සිටී.Ryan සහ Matt සතුටු සාමීචියෙන් වැඩ කරමින් සිටී.නමුත් ඔවුන්ට එසේ වැඩි වෙලා සිටීමට ලැබෙන්නේ නැත.ඉතා වේගයෙන්  පැමිණෙන උල්කා පාෂාණ වර්ශාවක ගැටී ඔවුන්ගේ ෂටලය විනාශයට පත් වෙයි.

ඉතිරි වන්නේ ඔවුන් දෙදෙනා පමණි.ඔවුන් පිහිට පතා යන්නේ රුසියානු අභ්‍යාවකාශ මධ්‍යස්ථානයටය.එහි සිටි අය ද එම උල්කා වර්ෂාවෙන් මිය ගොස් සිටී.ඒ අතර Matt ව ද Ryan ගෙන් වෙන් වී ඈතට පා වී යයි.ඉතිරි වන්නේ  Ryan පමණයි.අවසානයේ Ryan ට පෘතුවියට පැමිණීමට ලැබෙන්නේ පා වෙමින් තිබෙන චීන Capsule එකක් ආධාරයෙනි. ඒ  කතාවේ සාරාංශය යි.
ආර්ථික-දේශපාලනික ලෝකය තුල ඇමරිකාව රුසියාව සහ චීනය යන රටවල් සමග සීතල ගැටුමක් පවතින බව බොහෝ දෙනා දනී.

නමුත් පෘතුවියෙන් පිටත දී කරදරයක් ඇති වූ විට මිනිසුන්ට සිටින්නේ මිනිසුන්ම පමණක් බව සිනමා කරුවා(Alfonso Cuaron) අපට පෙන්වයි.ඒ බව අවසානයේ ඇමරිකානු ගගනගාමී කාන්තාවට(Ryan) චීන Capsule එකක් පිහිටෙන් මිහිතලයට එන්නට වෙන සිදුවීමෙන් උපහාසාත්මකව පෙන්වයි.තව ද කාන්තාවක සතු නො සැලෙන ශක්තිය මෙම චිත්‍රපටිය පුරා සිනමා කරුවා ඉස්මතු කර පෙන්වයි.කරදර පිට කරදර පැමිණුනත් ජීවිතයේ අභියෝග ජය ගත යුතුය යන පණිවිඩය ද ඉස්මතු කර පෙන්වයි.එක් තැනක දී Matt රුසියානු මධ්‍යස්ථානය වෙත පාවී යන අවස්තාවේ දී මොහොතකට නැවතී පෘතුවිය දෙස බලා Ryan ට ඇසෙන සේ 'කොච්චර ලස්සන ද' කියා පවසයි.එයින් සිනමා කරුවා පෙන්වන්නේ සමාජ-දෙශපාලන-ආර්ථික ලොකය තුල සිරවුණු මිනිසා නො දකින මිහිතලයේ ලස්සන නො වේද?. Gravity යනු ජීවිතය,මිහිතලය සහ මිනිසුන්ගේ වටිනාකම අපට අවබෝධකරවන සුන්දර සිනමා නිර්මාණයකි.මෙම චිත්‍රපටියට 2013 Oscar සම්මාන උළලේ හොඳම අධ්‍යක්ෂනය ඇතුළුව සම්මාන හතක් හිමි වීමෙන්ම ඒ බව ප්‍රතීයමාන වේ.
-----------
සමීර සම්පත්.

Thursday, December 18, 2014

ආදරේ..

දුම් වලා හා තනි වී..
තරු අහස දෙස බලා හිඳිමි..
ඇගේ දෑසින් පෑව සිනාවන්
නෙත් මානයේ පෙනේ මැවී..
මුවින් පිට වී
මගෙන් වෙන් වී
ඈතට ඈදී යන
දුම් වලා වේ..
සොයා ගොසින්
ඈ සිටිනා දෙසකට
පවසාලනු මැන
ආදරේ මගේ..
----
සමීර සම්පත්.

Wednesday, December 17, 2014

පාට ලෝක

නැග යන බැස යන
හිරු-සඳු අසිරිය
ගලා බැසී යන
නදියක ලස්සන
ලා-තද පැහැයට
දිදුළණ ගහ කොළ
මිහිරි ගයන ගී
කුරුලුගෙ නාදය
කවදා දකී ද?
පාට ලෝක වල
සිරවුණු ජීවිත.
----
සමීර සම්පත්.

Friday, December 12, 2014

අවසරයි තිත තබන්නට

දෑස් ඉදිරි පිට
සිහිනය බොඳ වූ විට
තවත් හැකි ද
පන පොවන්නට.
සොඳුරු රෝස කුසුමක් ගැන
තුන් කල් දුටුව
ඒ අසිරිමත් සිහිනයේ
බලාපොරොත්තුවට
අවසරයි තිත තබන්නට
සුපහන් සිතින්.
හෙට දිනේ පායන
හිරු මලේ එළියෙන්
අලුත් ලොවකට
පිය මනිනු පිණිස..
-----
සමීර සම්පත්